Kupiah Sampik, Kapalo Ditarah

[RB. KHATIB PAHLAWAN KAYO]

KUPIAH, marupokan simbol nan tamasuak kalengkapan pakaian niniak mamak di Minangkabau. Sacaro nasional kupiah nan tabuek dari baludu itam, ukuran tinggi antaro 9 sampai 14 senti sabananyo lah manjadi hak paten bangso kito. Di awal-awal kamardekaan dek sabana takah dan gagahnyo Bung Karno mamakai kupiah, mako disabuiklah kupiah BK (kupiah Bung Karno). Sampai kini kan iyo baitu, bara ka tampan dan gagahnyo buya-buya dan ustad-ustad kito tagak di mimbar sadang bakhutubah atou mambari pangajian nan pakai jas jo kupiah nan sarasi tu. Kadang-kadang ado jama'ah nan talena, sainggo lupo manyimak kaji buya/ustad dek mamparhatikan kupiahnyo.

Kupiah sampik, kapalo ditarah adolah kiasan untuak urang-urang nan bapangana singkek dan bapikiran sampik dalam manyalasaikan suatu pakaro/masaalah, baiak nan tumbuah di rumah tanggo atoupun nan tajadi dalam masyarakaik. Misalnyo katiko musim kamarau tibo, ujan indak turun-turun sampai babulan-bulan, sahinggo aia kariang, jan kan untuak mandi nan ka diminum sajo sulik dicari. Bantuak itu juo nan ka dimakan sagalo susah, sahinggo banyak panduduak nan sakik, anak-anak nan busuang lapa karano lah kuruih indak makan. Dalam kaadaa sarupo itu, ado pulo anak nan baru tamaik esde nan paralu pitih untuak malanjuikkan sakolah nan indak dapek ditundo-tundo. Dek urang tuo nan saari-ari tukang ojek, supato jan susah-susah, nan pantiang capek diatasi, mako dijua sepeda motornyo jo harago murah pulo. Sadangkan sepeda motor tu adolah alat nan dipagunokan untuak mancari iduik. Itu diantaro contoh tindakkan nan disabuik "kupiah sampik, kapalo ditarah" aratinyo masaalah nan diadoi iyo sabana sulik, tapi untuak mangatasinyo jo caro marusak pulo jo manarah (malukoi) kapalo. Mustinyo kupiah nan sampik tu dituka jo nan lapang, sainggo sanang mamakainyo. Mukasuiknyo untuak mangatasi masalah paralu dipikiekan eleok-elok, supayo indah manumbuahkan masalah baru.
Maknanyo, dalam maadoi sagalo macam kaadaan iduik, tarutamo nan sulik-sulik atou nan susah mambarekkan pikiran, mangganggu parasaan, ibaraiknyo "baban barek singguluang batu", indak tantu kama ka minta tolong, mako katiko tu nan paralu jan ilang aka. Sabagai urang nan baagamo kito disuruah badu'a ka Allah satiok sudah shalat, tarutamo shalat malam mintak partolongan untuak dibari kalapangan sambia taruih bausao. Tamui kawan-kawan, caritokan kaadaan jo kasulitan nan sadang diadoi, insya Allah dibaliak kasulitan ado kamudahan. Sabab Allah manjamin "sia sajo nan marangkak dimuko bumiko dijamin rasakinyo asa lai namuah bausao" (Q.S-11(Hud):6), nan pantiang jan putuih aso, taruih karajo kareh sambia taat baibadah. Mudah-mudahan.

sumber harian singgalang