Jan Sumbarang Sungkah

Ikolah kaba manakuik-an untuak urang-urang nan suko manyungkah makanan dari lua nagari. Saindaknyo urang-urang nan sok lua nagari, kaba ko paralu manjadi paratian. Kalau indak, bisa-bisa mambahayokan ka diri nan mangonsumsinyo. Bayangkan, 99,98 parsen makanan nan datang dari lua nagari bamasalah. Di antaro makanan bamasalah tu kecek Koran Singgalang kabanyakan adolah makanan ringan, minuman kaleang, roti, susu, pamasak atau bumbu, minuman baalkohol dan banyak lai jinihnyo.
“Kalau 99,98 parsen bamasalah, itu aratinyo 0,2 parsen se nan lai aman yo, Tan?” Kecek Udin Kuriak ka konco palangkinnyo. “Sasuai jo etong-etongan matematik, tantu iyo. Masalahnyo apo tu Din?” Kato Tan Baro baliak batanyo. “Iko ha. Kecek Koran hari kini, sambilan puluah sambilan koma sambilan lapan parsen makanan atau minuman impor ka nagari awak ko bamasalah. Kalau bantuak itu, tantu nol koma duo parsen se nan lai amannyo,” jawek Udin manjalehan. “Kok dek awak indak masalah bana doh Din,” jawek Tan Baro singkek. “Baa tu? Kan babayo kalau dikonsumsi,” baleh Udin. “Karano awak cuma makan abuih ubi, goreang pisang dan kopi Bukik Apik atau kopi Kudo Tabang. Inyo jadi masalah untuak urang-urang nan suko jo produk impor. Kan ado pulo di antaro awak ko nan gengsi mamakai produk dalam nagari dan bangga mamakai produk dari lua. Kadang inyo lupo, kalau produk dari lua nagari tu banyak masalahnyo. Umpamonyo makanan atau minuman kaleang, apo awak tau baa caro mambueknyo? Atau apo awak lai tau resepnyo? Antah pakai apo-apo se, dek awak lamak se sungkahnyo mah,” jawek Tan Baro manjalehan. “Ado pulo kawan den, bangga mamakai pakaian nan katonyo produk lua nagari. Mereknyo bahasa Inggirih se, tapi inyo lupo kalau baju tu asanyo dari Ampek Angkek dan diagiah merek jo bahaso Inggirih,” potong Angah Piyan. “Kalau itu lai indak masalah bana doh. Iko makanan, bisa mambahayokan kasehatan Ngah. Umpamonyo kanduangan zat kimia atau bahan-bahan lain nan indak sasuai jo tubuah awak,” sambuang Tan Baro. “Indak makanan jo minuman se doh Tan. Untuak pasangan iduik, banyak juo manusia di nagari awak ko nan suko produk impor. Wak ambiak se contonyo sabagian artis, tabulalak incek matonyo mancaliak bule-bule dan banyak nan manjadian jantan dari lua nagari tu laki. Indak paduli dari negara apo se, nan pentiang dari lua nagari. Negro jadi juo, Arab atau Jerman apolai,” potong Kari Garejoh. “Di kampuang den latah namonyo mah. Padohal produk nagari awak indak kalah gai dari lua nagari doh. Malah, nan dijua di lua nagari tu juo ado nan dari Indonesia datangnyo. Contohnyo lapiak sumbayang atau sajabah. Bara ka bangganyo jemaah haji mambali lapiak sumbayang maha-maha di Makah, eh di antaro lapiak sumbayang tu didatangkan dari Jawa,” kato Mak Pono pulo. “Sarancaknyo awak bangga mamakai produk dalam nagari. Ijan sumbarang sungkah se makanan nan datang dari lua nagari. Antah halal, antah indak, antah lai sasuai jo tubuah awak antah indak. Kan iyo baitu ndak Tan?” kecek Udin mintak pandapek konco palangkinnyo. Nan ditanyo cuma maangguak sajo sambia galak manih.

sumber: hariansinggalang.co.id