Limo macam tabiat parangai parampuan diminangkabau…
Ampek sifaik nan buruak, ciek nan elok kadipakai..
Nan partamo parampuan barau-barau
Nan kaduo parampuan layang-layang
Nan katigo parampuan lawah-lawah
Nan kaampek parapuan anai-anai
Nan kalimo parampuan ramo-ramo…
Tasabuik parampuan barau-barau…
Ilia ota, mudiak bagunjiang, mangecek asah mangango, barundiang bunyi piluru, galaknyo badaram-daram… Ado kalonyo indak tahu ujuang jo pangka, urang kakanai tak diagak, baa muncuang curapak piyuah, baa kulaliak incek mato, bajagangan urek lihianyo.. Itu tabiat ndak tapuji tu diak... Buruak sifaik sumbang karenah, cilako dek urang parampuan… Kok nak sopan dipandang urang, supel, anggun, keibuan feminim bahaso kalian... Bakatolah jo lunak lambuik, banyak kan sengeang dari galak, sabuik sakadar nan paguno, barundiang usah barabuik, mangecek baganti-ganti, dangakan dulu tutua urang, lah tumbuah baru disiang, tapi kok indak paralu bana rancaklah diam antok sajo, “sabab dek lidah indak batulang, bibia indak bapaga, banyak kecek banyak nan sasek, banyak kato banyak nan lato”… Nyampang minyak taruah ateh batu, dapek dikauik dikampuangkan diak, tapi kalaulah muluik yang taserak, bateba dibawo angin, indak tapiliah-piliah lai.. “Bicara itu perak, diam itu emas”… baitu pituah urang pandai..
Adopun parampuan layang-layang..
Lah galik dek buruang layang-layang, alun tasingik matohari, alun tantu hari kasiang, inyo bagageh kalua sarang… Layok malayok diudaro, layang malayang ilia mudiak, maradai maliuak-liuak, bapacu tabang samo gadang... Pueh mambumbuang masuak awan, inyo manukiak tajun randah, semba suok lalah ka kidah, lah sanjo barunyo pulang… Ikolah lambang jo simbol parampuan, nan suko kalua rumah, hobinyo bahura-hura... Salapeh pulang sikolah, batodan dulu masuak pasa, cangang kian rongok kamari, caliak iko rabo nan itu, tanyo harago ciek-ciek, mambali sauleh haram... Asa kan ado karamaian, bia ba band atau batandiang, kononlah pulo layar tancap, inyo lah datang labiah dulu... Patang-patang sanjo katibo, bapusu duduak disimpang, maota bakarikik an, mejeng istilah dibetawi... Padohal dirumah banyak bangkalai, kain kumuah alah tarandam, nasi lah patuik dijarangkan, laman samak sarok batabua, pe-er nan alun dikarajoan... Mako tapek istilah-istilah urang “kalau mau melihat kepribadian seseorang gadis lihatlah rumah tangganya, mau tahu kebersihan perempuan lihatlah kamar mandinya”.
Baa pulo kalau parampuan lawah-lawah...
Kalau layang-layang suko malala, mako lawah-lawah jinak dirumah… Satapak indak kalua, sajangka haram baranjak, inyo tagak dijanjang tanggo, mananti tamu sasek inggok... Dibuek sarang bakulindan, bagatah bajulimek, wujuiknyo jariang bakambangan, manahan jarek di nan langang... Bantuaknyo cando kamati, malangkah taregek-regek, barek tandan sarik bakisa, tapi niaik salah pangana sumbang, paham jaek mukasuik buruak... Sia nan lalu asa tapakiak, tiok nan singgah jadi bangkai, disosok darah tadagiang, dicucuik sampai kabanak, lah karabang ditinggakannyo... Kok tibo dimanusia diak, basuo bakeh padusi, itulah gadih pangeretan, mato duitan istilahnyo... Muluik manih dibuek-buek, ramah tamah ba ajan-ajan, wujuiknyo cari paratian, lah tadayo urang kaawak, baru lah ganduah dilalukan... Manyalang bakalalaran, icah mambon icah maminjam, bautang pantang mambayia, ditagiah urang dimusuahi, diburuak an sabalik kampuang, difitnah dipagunjiangan, aib rahasio dicukia-cukia, korbanlah urang lah manangguang... Baitu pulo dirumah tanggo, rang gaek digaledah, saku suami dipareso.. kok konon pacar tunangannyo, lah kariang cari cowok baru.. indahkan bana woy adiak oyy…!!
Danga pulolah caritonyo parampuan bagala anai-anai
Sifaik buruak dek anai-anai, mudah tarambau jo rayuan, gilo bagadang hati sajo, alun dijujai nyo lah galak, alun digabik lah manuruik, indak dikana mularaiknyo... Cubo paratian elok-elok, ambia iktibar jo tauladan, siang tabanam dalam sauang, indak maliek matohari, lah malam baru kalua… Dari jauah nampak cahayo, lalu bakaja bakeh lampu, bamain basuko-suko, kurang hampia batambah hampia, lah dakek baniaik hinggok, angek taraso bakuliliang, manyingga kabatang tubuah… Tapi dek jarang maliek cahayo, disangko tabuak kasubaliak, kironyo api nan tagabai, badan hanguih sayok mabaro, tabangkai jatuah kabawah… Dek rombongan yang baru tibo, lah nyato mayik bagalimpangan, marapak mati tabaka, bahondoh juo masuak lampu, main jo api nan taragak, akianyo sangsaro pulo... Itulah sifaik sio-sio diak, indak mancontoh bakuliliang, sagan baguru dari alam, hati gadang nan dipaturuik kan… Dek sabab karano itu, jan tadayo jo kileknyo, usua pareso sudah-sudah, bawok bapikia dalam-dalam… Acoklah bana kajadian diak, lupo diri lupo daratan, sanangnyo sajo nan tabayang, lah kanai mako manyasa, sasa nan indak ado gunonyo… Sasuai bak bunyi pantun “ kabalai pakan salido, mambali ikan jo tanggiri, tali buayaian sadionyo, kironyo gantuangan badan diri’… Hati dalam bagaua diak, ingek-ingek dalam bakawan apolai jo laki-laki, dicaliak contoh kanan sudah , dicaliak cilako ka nan kalah… Urang pai jalan malenggang, awak tingga maratok nasib, tangguang sandiri akibatnyo… Kalau padusi lah dapek malu, bak payuang tagajai pasak, indak kakambang-kambang lai, kucuik apolah kagunonyo… Malantailah sabalun luluih diak, bamakan sabalun abih, sudahkan dulu baru dimulai, itulah amanah urang tuo, uda manyampai maingek an…
Adopun yang pangabisan adolah parampuan ramo-ramo…
Ikolah nan kaditiru, dicontoh ditauladani, lambang anak gadih minangkabau… Awak elok bulu baminyak, sayok babungo baliak balah, jinak baraso katacakau, lianyo allohu rabbi, uranglah mati malinggaman... Hinggoknyo basikua-sikua, tabangnyo bakawan-kawan... Bakatiko baru kalua, basamo makonyo nampak… Bamain bukan sumbarang main, tapi bamain kahalai bungo, batandang kabanang sari, dek arih pandai batenggang, aluih lunak bawoan badan, daun panggarang tak tagoyang, silaro indaknyo gugua, tangkai nan mintak dihinggok i, baitu budi ramo2... Kalaua awak gadih babudi diak, bataratik didalam rumah, sopan santun kalau dilua, pandai basegeh jo badandan... Kama pai musti batantu, saizin baru bajalan, jaleh tujuan jo makasuik, bukan malala ndak karuan… Pergauli nan samo gadang, rapek i nan tuo2, cari nan panjang pangalaman, nak batukuak tambah ilmu awak... Jiko mambali kaparaluan, sasuaian jo kabutuhan, ukua tanago ekonomi, sapanjang tubuah bayang-bayang... Sabab malabiahkan ancak-ancak, mangurangi sio-sio, jauahkan niaik jo takabua... Lansano awak buruang pipik diak, ulek daun kajatah awak, buah rumpuik bakeh rasaki, jan di cito makanan anggang, sok kato rang kota, pundik kecek rang kampuang, over dosis istilah dokter, badan kau juo manangguangkan…
itu nasehat dari niniak mamak kito.. mudah2 an diambiak pangajaran, jan sampai lupo jo nasehat rang tuo..
sumber: kaskus regioanal minangkabau
Comments